ცხვირი ცხვირზე,

გული გულზე,

სუნთქვა სუნთქვას გაენაბა,

აციმციმდა თვალები და

ღიმი ღიმში გამეხლართა.

ბაგაბუგით სისხლი დადის,

დააქვს სითბო,

სიტკბო დააქვს,

შენს თვალებზე ღრმა და ნაზი

სილამაზე ცასაც არ აქვს.

მივიხედე გვერდზე, წამში

გაგეხლართა ხელი თმაში,

ამიჩეჩე-დამიჩეჩე.

ღიმი უფრო თბილი მზეზე...

სიყვარული უთქმელი და

გამომდნარი თვალებიდან,

სადღა არის ტკივილები?

ცხრა მთას იქით გამერიდა...

აკრეფილი, აზიდული

თმა მძიმეა, მუქზე მუქი

და კეფაზე კოცნა დაჯდა,

სიყვარულის ტკბილი დამღა...

წამწამებთან წამწამები,

შენს თვალებში ჩავიძირე...

ორი მკლავი, თბილზე თბილი

- მოდი აქ, არ გამიცივდე...